Stock News: பங்குச் சந்தையில் கடும் வீழ்ச்சி - அடங்காத ‘ட்ரம்ப் விளைவு’ காரணம்!

அமெரிக்க அதிபர் ட்ரம்ப் தொடர்ந்து மேற்கொண்டு வரும் அதிரடி நடவடிக்கைகள், வெளிநாடு முதலீட்டாளர்களின் ஆர்வமின்மை உள்ளிட்ட காரணங்களால் இந்திய பங்குச் சந்தைகளில் கடும் வீழ்ச்சி நிலவுகிறது.

மும்பை பங்குச் சந்தையில் இன்று (பிப்.10) காலை வர்த்தகம் தொடங்கும்போது, சென்செக்ஸ் 343.83 புள்ளிகள் சரிந்து 77,516.36 ஆக இருந்தது. அதேவேளையில், தேசிய பங்குச் சந்தையில் நிஃப்டி105.55 புள்ளிகள் சரிந்து உயர்ந்து 23,454.40 ஆக இருந்தது.

வர்த்தக தொடக்கத்தில் இருந்தே கடும் வீழ்ச்சி நிலவி வருவது முதலீட்டாளர்கள் மத்தியில் கலக்கத்தை நீட்டிக்கச் செய்துள்ளது.

இன்று முற்பகல் 11.45 மணியளவில் சென்செக்ஸ் 547.59 புள்ளிகள் (0.70%) சரிந்து 77,312.59 ஆகவும், நிஃப்டி 168.40 புள்ளிகள் (0.71%) சரிந்து 23,391.55 ஆகவும் இருந்தது.

காரணம் என்ன?

அமெரிக்க பங்குச் சந்தை இறக்கத்துடனே நிலை கொண்டது. ஆசிய பங்குச் சந்தைகளைப் பொறுத்தவரையில், சியோல் மற்றும் டோக்கியோவில் இறக்கமும், ஷாங்காய் மற்றும் ஹாங்காங் பங்குச் சந்தைகளில் ஏற்றமும் நிலவுகிறது.

டாலருக்கு நிகரான ரூபாய் மதிப்பு இப்போது வரலாறு காணாத வகையில் வீழ்ச்சி கண்டுள்ளது. அமெரிக்க அதிபர் ட்ரம்ப் புதிதாக இரும்பு, அலுமினியத்துக்கு 25% இறக்குமதி வரி விதிக்கப்படும் என்று வெளியிட்டுள்ள அறிவிப்பும் சர்வதேச அளவில் அதிர்வலைகளை ஏற்படுத்தியுள்ளது.

குறிப்பாக, வெளிநாட்டு முதலீட்டாளர்கள் பங்குகளை வாங்குவதில் ஆர்வம் காட்டாததன் எதிரொலியாக, இந்தியப் பங்குச் சந்தைகளில் கடும் வீழ்ச்சி நிலவி வருகிறது.

ஏற்றம் காணும் பங்குகள்:

இந்துஸ்தான் யூனிலீவர்

விப்ரோ

எம் அண்ட் எம்

கோடக் மஹிந்திரா பேங்க்

பாரதி ஏர்டெல்

டிசிஎஸ்

ஐடிசி

இறங்கு முகம் காணும் பங்குகள்:

டாடா மோட்டார்ஸ்

ஐசிஐசிஐ பேங்க்

நெஸ்லே இந்தியா

எஸ்பிஐ

சன் ஃபார்மா

பஜாஜ் ஃபின்சர்வ்

இன்ஃபோசிஸ்

எல் அண்ட் டி

ரிலையன்ஸ் இண்டஸ்ட்ரீஸ்

டாடா ஸ்டீல்

ரூபாய் மதிப்பு

இன்றைய வர்த்தக தொடக்கத்தில் அமெரிக்க டாலருக்கு நிகரான இந்திய ரூபாயின் மதிப்பு 45 பைசா குறைந்து ரூ.87.95 ஆக இருந்தது. இது வரலாறு காணாத வீழ்ச்சியாக உள்ளது.