சரிந்த பிசினசை Linkedin, இன்ஸ்டா மூலம் நிறுவனர் சுதர்சனன் கணபதி சரிசெய்தது எப்படி?
சமூக வலைதளங்கள் பெரும்பாலானவர்களுக்கு பொழுதுபோக்குவதற்கான இடம். ஆனால் சிலர் தொழிலுக்கான வாடிக்கையாளர்களை உருவாக்குவதே சமூக வலைதளங்கள் மூலமாகதான். அப்படி தனது தொழிலை விரிவுப்படுத்தி வெற்றி கண்டவர் சுதர்சனன் கணபதி.
சமூக வலைதளங்கள் பெரும்பாலானவர்களுக்கு பொழுதுபோக்குவதற்கான இடம். ஆனால் சிலர் தொழிலுக்கான வாடிக்கையாளர்களை உருவாக்குவதே சமூக வலைதளங்கள் மூலமாகதான்.
கணிசமானவர்கள் தங்களுடைய சமூக வலைதளங்களை அவர்களே பார்த்துக்கொள்வார்கள். ஆனால், இந்த கலை அனைவருக்கும் வாய்ப்பதில்லை. அந்த பிரிவில் கவனம் செலுத்துகிறது 'தி சோசியல் கம்பெனி.'
பல சமூக வலைதளங்கள் இருந்தாலும் Linkedin–இ ல் மட்டுமே கவனம் செலுத்தி அதில் சிறந்த சேவை அளிக்கிறது இந்நிறுவனம். தனிநபர்களின் லிங்கிடின் கணக்குகளை இந்த நிறுவனம் கையாளுகிறது. கவனிக்க, நிறுவனங்கள் அல்ல நிறுவனங்களின் தலைவர்களின் பக்கங்களை கையாளுகிறது.
இந்த நிறுவனத்தின் நிறுவனர் சுதர்சனன் கணபதி இது பற்றி விரிவாக விளக்கினார். இந்தத் தொழிலுக்கு எப்படி வந்தார். சமூக வலைதளங்கள் தொழிலுக்கு எப்படி உதவுகின்றன, இதனுடைய பாதை எப்படி இருக்கும் என பல விஷயங்கள் குறித்து உரையாடினோம்.
ஆரம்பகாலம்
சொந்த ஊர் தூத்துக்குடி. ஆனால், நான் படித்தது வளர்ந்தது அனைத்துமே சென்னையில்தான். அப்பா குவைத்தில் வேலை செய்துவிட்டு இந்தியா திரும்பினார். சென்னையில் தொழில் தொடங்கி நடத்திவந்தார். ஆனால் துரதிஷ்டவசமாக என்னுடைய ஆறு வயதில் இறந்துவிட்டார். அடுத்த சில ஆண்டுகள் எங்களுக்கு சிரமான காலகட்டம்.
ஒரே ஒரு நல்ல விஷயம் என்னவென்றால் அப்பா கடனை விட்டுச் செல்லவில்லை. வெளிநாட்டில் வேலை செய்தவர் என்பதால் சொந்தமாக சிறிய வீட்டினை வாங்கி இருந்தார். ஆனால், பணப்புழக்கம் என்பது கிடையாது.
“அம்மா கிடைத்த வேலையை செய்தார். டெய்லர், டியூஷன் உள்ளிட்டவற்றை செய்தார். அதுதான் எங்கள் குடும்பத்தின் வருமானம். நான்கு வருடங்களுக்கு பிறகுதான் அம்மாவுக்கு ஆசிரியர் பணி கிடைத்தது. அதன் பிறகுதான் நிதி நிலைமை சற்று சீரானது,” என்றார் சுதர்சனன்.
நானும் தம்பியும் நன்றாக படித்தோம். அனைவரையும் போல நானும் இன்ஜினீயரிங் படித்தேன். இறுதி ஆண்டில் எலெக்டிவ் எடுக்க வேண்டும். எனக்கு ரோபோட்டிக்ஸ் படிக்க வேண்டும் என்பது விருப்பம். ஆனால், அங்கு இடமில்லை. அப்போதுதான் entrepreneurship பேப்பர் கிடைத்தது. எனது பேராசிரியர் சங்கர் கணேஷ். தொழில்முனைவு குறித்து ஆர்வம் வந்தது அவரால் தான். சங்கர் கணேஷ் சார் பெரும் தாக்கத்தை ஏற்படுத்தினார்.
டிசிஎஸ் உள்ளிட்ட சில நிறுவனங்களில் வேலை ஆபர் கிடைத்தது. ஆனால், வேலைக்கு செல்ல விருப்பமில்லை. எங்கள் வீட்டில் பெரும்பாலானவர்கள் அரசு வேலை. ஆனால் நான் வேலைக்குச் செல்லவில்லை, என அம்மாவிடம் சொன்னேன். அம்மா இது ரிஸ்க் ஆனாலும் இரண்டு ஆண்டு அவகாசம் கொடுத்தார்.
அப்போது எம்.இ. படித்துக்கொண்டே சமூக வலைதளங்களை கையாளும் நிறுவனத்தை தொடங்கினேன். ஓட்டல், சலூன், சூப்பர் மார்க்கெட் உள்ளிட்ட பிரிவைச் சேர்ந்தவர்கள் வாடிக்கையாளர்களாகக் கிடைத்தார்கள். எம்.இ. படித்து முடிப்பதற்குள் போதுமான வாடிக்கையாளர்களை சேர்த்துவிட்டேன். ஆனால் அதன்பிறகு வேலைக்குச் செல்ல வேண்டிய சூழல் ஏற்படவில்லை.
அப்போது என்னுடைய அண்ணன் தரணிதரன் வெளிநாட்டில் இருந்து இதேபோன்ற ஐடியாவில் இந்தியாவுக்கு வந்தார். அவர் தொடங்கிய நிறுவனம் ’தி சோசியல் ஈகிள்’. அதை நாங்கள் இருவரும் பார்த்துக்கொண்டோம். பல வாடிக்கையாளர்களை ஈர்த்தோம்.
“என்னுடைய பலம் இன்ஸ்ட்ராகிராம். அதனால், அந்த பிரிவை மட்டுமே கவனிக்கும் நிறுவனத்தை தொடங்கினோம். அதுதான் ’தி சோசியல் கம்பெனி.’ இன்ஸ்டா தொடர்பாக வரும் அழைப்புகளை அண்ணன் எனக்கு தருவார். அவர்களுக்கு ஏதுவான தகவல்களை நான் வழங்குவேன்.”
பிஸினஸ் நன்றாக இருந்தது. சுமார் 20க்கும் மேற்பட்ட வாடிக்கையாளர்கள் இருந்தனர். இதில் ஆறு வாடிக்கையாளர்கள் வெளிநாட்டவர்கள். மற்றவர்கள் சென்னையைச் சேர்ந்த வாடிக்கையாளர்கள்.
இந்த சூழலில் கோவிட் வந்தது. எங்களுடைய வளர்ச்சி அப்படியே சரிந்தது. வெளிநாட்டு வாடிக்கையாளர்கள் மட்டுமே எங்களுடன் இருந்தனர். உள்நாட்டு வாடிக்கையாளர்கள் அவர்களுடைய சேவையை அப்படியே நிறுத்தினார்கள்.
”அவர்களையும் குற்றம் சொல்லமுடியாது. பிஸினஸ் இல்லை என்னும் பட்சத்தில் மார்க்கெட்டிங் செலவு வீண் என்பதை எங்களால் புரிந்துகொள்ள முடிந்தது. ஆனால் எங்களுக்கு வாடிக்கையாளார் இல்லை என்பதுதான் எதார்த்தம்.”
என்னிடம் கொஞ்சம் சேமிப்பு இருந்தது. கடன் வாங்கவில்லை, சில வாடிக்கையாளர்கள் இருந்ததால் எங்களுக்கு சிக்கல் இல்லை. ஆனால், எங்களை மறுபரிசீலனை செய்ய வேண்டிய சூழல் உருவானது. மற்றவர்களுக்கான மார்க்கெட்டிங் செய்யத் தொடங்கினோம்.
எத்தனையோ கிளையண்டுகளை சமூக ஊடகம் மூலம் பிரபலப்படுத்தினோம், ஆனால் எங்களை நாங்கள் பிரபலப்படுத்திக் கொள்ளவில்லை. அப்போதுதான் எங்களுக்கும் மார்க்கெட்டிங், பிராண்டிங் முக்கியம் என புரிந்தது. அப்போது முதல் எங்களுக்காக செயல்பட வேண்டும் என்னும்போதுதான் Linkedin பயன்படுத்த முடிவெடுத்தேன்," என்றார் சுதர்சனன்.
ப்ராண்ட் வளர்ச்சிக்கு ‘Linkedin'
எனக்கு தொழில் மூலம் லின்கிட்-இல் சில ஆயிரம் கனெக்ஷன்கள் இருந்தாலும் பெரும்பாலும் பயனில்லாதவையாக இருந்தது. பெரும்பாலானவர்களை நீக்கிவிட்டு, மீண்டும் புதிதாக லிங்கிடின் புரைபைலை உருவாக்கத் தொடங்கினேன். குறிப்பாக கோவிட் காலத்தில் 14 மாதங்கள் தொடர்ந்து போட்ட பதிவுகளால் எனக்கு 25 அயிரம் ஃபாலோயர்கள் வந்தனர். அதுவே எனக்கும் என் ப்ராண்டிற்கும் நல்ல வளர்ச்சியை கொடுத்தது.
தொடர்ந்து லிங்கிடினில் ஆக்டிவாக இருந்தோம். நாங்கள் என்ன செய்கிறோம் என்பதை தொடர்ந்து வெளிபடுத்திக்கொண்டே இருந்தோம். இதனால் எங்களுக்கு புதிய வாடிக்கையாளர்களை வந்தனர்.
அதன் பிறகு, லிங்கிடினில் மட்டுமே கவனம் செலுத்தினேன். லிங்கிடினை எப்படி கையாளுவது என்பதையே ஒரு சேவையாக மாற்றினோம். அதுவும் நிறுவனங்களின் பக்கங்களை கையாளுவதை விட நிறுவனங்களின் நிறுவனர்கள் மற்றும் தலைவர்களின் பக்கங்களைக் கையாளுகிறோம் என சுதர்சனன் தெரிவித்தார்.
நிறுவனங்களின் பக்கங்களை கையாளுவதன் மூலம் வாடிக்கையாளர்கள் கிடைப்பார்கள். ஆனால், தனிநபர்களுக்கு ஏன் கவனம் செலுத்த வேண்டும் என்னும் கேள்விக்கு விரிவாக பதில் அளித்தார் சுதர்சனன்.
சில ஆண்டுகளுக்கு முன்பு நிறுவனங்கள் மட்டுமே முக்கியமாக இருந்தது. ஆனால், தற்போது நிறுவனர்களுக்கான பிராண்டும் முக்கியம். நிறுவனர்கள் தொடர்ந்து ஆக்டிவாக இருக்கும்போது அவர்கள் மூலமாகவும் வாடிக்கையாளர்கள் கிடைப்பார்கள்.
”இதுதவிர தற்போது வேறு ஒரு விஷயமும் நடந்துவருகிறது. ஒரு நிறுவனம் தொடங்குகிறார்கள். வளர்ச்சி அடைய வைத்த பிறகு விற்றுவிட்டு வேறு நிறுவனம் அல்லது பெரிய வேலைக்கு சென்றுவிடுகிறார்கள். அதனால் தனிநபர்களின் பிராண்ட் தவிர்க்க முடியாததாகி விடுகிறது,” எனத் தெரிவித்தார்.
மேலும், ஆர்கானிக் ரீச் என்பது லிங்கிடினில் மட்டுமே தற்போது இருக்கிறது. அதாவது நீங்கள் ஒரு விஷயத்தை லைக் அல்லது கமெண்ட் செய்தால், அந்த தகவல் உங்கள் நண்பர்களுக்கு செல்லும். மேலும் மற்ற சமூக வலைதளங்களை விட லிங்கிடின் வாடிக்கையாளர்கள் மிகவும் குறைவு.
அதாவது, தேர்ந்தெடுத்த வாடிக்கையாளர்கள் மட்டுமே உள்ளனர். லிங்கிடின் பயனாளர்களின் சராசரி வருமானம் மிக அதிகம். மற்ற சமூக வலைதளங்கள் பொழுதுபோக்குக்காக உள்ளன. ஆனால் இது தொழிலுக்காக இருப்பதால் தொழிலில் இருப்பவர்கள் சிறப்பாக பயன்படுத்திக்கொள்ள முடியும்.
யார் வாடிக்கையாளர்கள் / எவ்வளவு கட்டணம்?
நாங்கள் மார்க்கெட்டிங்காக எந்த செலவும் செய்வதில்லை. லிங்கிடினில் எங்களுடைய செயல்பாடு காரணமாக வாடிக்கையாளர்கள் வருகிறார்கள். நிறுவனத்தின் தலைவர்கள், ஸ்டார்ட் அப் நிறுவனர்கள், உயர்பதவியில் இருப்பவர்கள் என பலரும் எங்கள் வாடிக்கையாளர்களாக இருக்கிறார்கள்.
நாங்கள் மூன்று மாதத்துக்கு ஒரு லட்சம் + ஜிஎஸ்டி வாங்குகிறோம். எங்களிடம் ஒரே கட்டணம்தான். பெரிய நிறுவனத்தின் சி.இ.ஓ வாக இருந்தாலும் சரி, சிறிய நிறுவனமாக இருந்தாலும் ஒரே கட்டணம்தான். காரணம் வேலை என்பது இங்கு ஒன்றுதான். இப்போதைக்கு சுமார் 50 வாடிக்கையாளர்கள் உள்ளனர். எங்களிடம் தற்போது 11 நபர்கள் வேலையில் உள்ளனர். சிறிய அலுவலகம் இருக்கிறது. இருந்தாலும் பெரும்பாலானவர்கள் வீட்டில் இருந்துதான் வேலை செய்கிறோம் என்றார்.
லிங்கிடினை பயன்படுத்த நினைப்பவர்களுக்கு உங்கள் ஆலோசனை என்ன என்று கேட்டதற்கு,
“நீங்கள் என்ன செய்கிறீர்கள் என்பதை தொடர்ந்து சொல்லிகொண்டே இருங்கள். ஆரம்பத்தில் வாரத்துக்கு 3 போஸ்ட் என்னும் அளவில் இருக்கட்டும். தொடர்ந்து பயன்படுத்துவதன் மூலம் உங்களுடைய பிராண்ட் மதிப்பை உயர்த்துவது மட்டுமல்லாமல் உங்களுக்குத் தேவையான வாடிக்கையாளர்களும் கிடைப்பார்கள்,” என சுதர்சனன் தெரிவித்தார்.
உரையாடல் முடிந்ததும், சரி நாமும் நம்மை பிரபலப்படுத்திக்க, இந்த கட்டுரையை என்னுடைய லிங்கிடினில் போஸ்ட் செயய் வேண்டும் என்று நினைத்துக்கொண்டு விடை பெற்றேன்...