Stock News: பங்குச் சந்தையில் தொடரும் வீழ்ச்சி - சென்செக்ஸ் 400+ புள்ளிகள் சரிவு!

சர்வதேச போக்குகளின் எதிரொலி, வெளிநாட்டு முதலீட்டாளர்களின் கைவிரிப்பு உள்ளிட்ட காரணங்களால் இந்திய பங்குச் சந்தைகளில் கடும் வீழ்ச்சி நிலவுகிறது. சென்செக்ஸ், நிஃப்டி புள்ளிகள் வெகுவாக சரிந்துள்ளன.

மும்பை பங்குச் சந்தையில் இன்று (பிப்.21) காலை வர்த்தகம் தொடங்கும்போது, சென்செக்ஸ் 202.21 புள்ளிகள் சரிந்து 75,533.75 ஆக இருந்தது. அதேவேளையில், தேசிய பங்குச் சந்தையில் நிஃப்டி 63.5 புள்ளிகள் சரிந்து 22,849.65 ஆக இருந்தது.

இன்றும் பங்குச் சந்தை வர்த்தகத்தில் தடுமாற்றம் நீடிப்பது முதலீட்டாளர்களை மென்மேலும் கவலையடையச் செய்துள்ளது.

இன்று பிற்பகல் 12.15 மணியளவில் சென்செக்ஸ் 409.73 புள்ளிகள் (0.54%) சரிந்து 75,326.23 ஆகவும், நிஃப்டி 122.95 புள்ளிகள் (0.54%) சரிந்து 22,790.20 ஆகவும் இருந்தது.

காரணம் என்ன?

அமெரிக்க பங்குச் சந்தை வர்த்தகம் பாதகமாகவே நிறைவு பெற்றது. ஆசிய பங்குச் சந்தைகளைப் பொறுத்தவரையில் டோக்கியோ மற்றும் சியோல் பங்குச் சந்தைகளில் இறக்கமும், ஷாங்காய் மற்றும் ஹாங்காங் பங்குச் சந்தைகளில் ஏற்றமும் நிலவுகிறது. இந்த சர்வதேச சந்தைகளின் தாக்கமும் இந்திய பங்குச் சந்தைகளில் எதிரொலித்துள்ளது.

குறிப்பாக, அமெரிக்க அதிபர் டொனால்டு ட்ரம்பின் வரிவிதிப்பு தொடர்பான புதிய அச்சறுத்தல்களும், வெளிநாட்டு முதலீட்டாளர்கள் தங்கள் வசமுள்ள பங்குகளை விற்பதிலேயே ஆர்வம் கொண்டிருப்பதாலும் இந்தியப் பங்குச் சந்தைகள் தொடர்ந்து தடுமாற்றம் கண்டு வருகின்றன.

ஏற்றம் காணும் பங்குகள்:

டாடா ஸ்டீல்

என்டிபிசி

எல் அண்ட் டி

ஹெச்சிஎல் டெக்னாலஜிஸ்

நெஸ்லே இந்தியா

ரிலையன்ஸ் இண்டஸ்ட்ரீஸ்

டிசிஎஸ்

ஏசியன் பெயின்ட்ஸ்

இறங்கு முகம் காணும் பங்குகள்:

இன்ஃபோசிஸ்

டாடா மோட்டார்ஸ்

எஸ்பிஐ

ஆக்சிஸ் பேங்க்

பஜாஜ் ஃபின்சர்வ்

டைட்டன் கம்பெனி

டெக் மஹிந்திரா

சன் பார்மா

பஜாஜ் ஃபைனான்ஸ்

விப்ரோ

மாருதி சுசுகி

ஐடிசி

பாரதி ஏர்டெல்

ரூபாய் மதிப்பு

இன்றைய வர்த்தக தொடக்கத்தில் அமெரிக்க டாலருக்கு நிகரான இந்திய ரூபாயின் மதிப்பு 14 பைசா உயர்ந்து ரூ.86.50 ஆக இருந்தது.